t Evengelie volgens Lucas 24
01Op eerste dag van week, smörgens hail vroug, gingen ze noar t graf tou mit bie zok kruden dij ze kloarmoakt haren.
02Ze vonden stain veur t graf votrold.
03Dou ze der ingoan wazzen, vonden ze Jezus zien liggoam nait.
04Ze wozzen nait wat of ze der van denken mozzen. Inains stonden doar twij manlu bie heur mit blinkende klaaier aan.
05Doar werden ze zo kèl van, dat ze sluigen ogen omdeel. Dij twij manlu zeden: "Wat zuik ie dij leeft, bie doden?
06Hier is e nait. Hai is opwekt. Wait ie nog wel wat of e tegen joe zegd het dou e nog in Galilea was?
07Dat Menskenzeun oetleverd worden mos aan zundege mensken en dat e kruzegd worden mos en op daarde dag weer opstoan zol?"
08Dou kwammen zien woorden heur weer in t zin.
09Ze gingen van t graf weerom en vertelden t aalmoal aan de elm en aal aandern.
10 Dij vraauwlu wazzen Maria oet Magdala, Johanna en Maria, Jakobus zien moeke. Ook d'aander vraauwlu dij bie heur wazzen, vertelden t weer aan apostels.
11 Dizze woorden kwammen leerlingen veur as proatjes. Ze wollen heur nait leuven.
12 Mor Petrus ging stoan en runde noar t graf tou. Dou e zok bukte, zag e bloots douken liggen. Hai ging weer noar hoes tou, hail verwonderd over wat of ter veurvalen was.
13 Mor wat wil t gevaal? Dij aigenste dag wazzen twij leerlingen onderwegens noar t dörp Emmaüs. Dat ligt zowat twij uur lopen van Jeruzalem òf.
14 Ze haren t mitnkander over aal wat of ter veurvalen was.
15 Dou ze t doar over haren en dat bepruiten, kwam Jezus zulm bie heur en laip mit heur op.
16 Mor ze zagen nait dat hai t was.
17 Hai zee tegen heur: "Woar loop ie zo drok over te proaten?" Mismoudeg bleven ze stoan.
18 Ain van heur, Kleopas was de noam, zee tegen hom: "Hol ie joe den zo op joezulm en stoan ie zo boeten t levent in Jeruzalem, dat ie nait vernomen hebben wat of doar dizze doagen veurvalen is?"
19 Hai zee tegen heur: "Wat den?" "Wat of ter veurvalen is mit Jezus oet Nazaret. Dat was n profeet, machteg in woord en waark veur God en t haile volk.
20 Hou of ons opperpriesters en laaiders hom oetleverd hebben, dat hai ter dood veroordaild worden zol. En dat ze hom aan t kruus sloagen hebben.
21 Wie haren zo hoopt, hai was man dij kommen zol om Israël vrij te moaken! Mor aal mit aal is t nou al drij doagen heer dat dij dingen gebeurd binnen.
22 Toch hebben gounent van ons vraauwlu ons van wies brocht. Ze haren veur dag en daauw bie t graf west,
23 mor ze haren zien liggoam nait vinden kind. Ze kwammen ons vertellen, dat heur engels verschenen wazzen, dij zeden dat e leeft!
24 Gounent van ons binnen noar t graf tougoan en t was al net zo as vraauwlu zegd haren, mor homzulm hebben ze nait zain."
25 Hai zee tegen heur: "Domme lu! Wat duurt t ja laank veur dat joen haart ales leuven wil wat of profeten zegd hebben.
26 Mos de Christus dit nait deurmoaken om tou zien heerlekhaid te kommen?"
27 Dou begunde hai bie Mozes en ging zo ale profeten bie langs om heur oet te leggen wat of ter in aal dij geschriften over hom te lezen ston.
28 Dou ze dicht bie t dörp kommen wazzen doar of ze hèngingen, dee e net of e wiedergoan wol.
29 Mor ze huilen hom tegen en zeden: "Blief bie ons! t Lopt ja al tegen oavend en dag is dommit om!" Dou kwam e der in en bleef bie heur.
30 Dou e mit heur aan toavel goan was, pakte hai brood, sprak zegenbee oet, brook t en langde heur t tou.
31 Dou gingen heur ogen open en ze zagen, dat hai t was. Mor hai verswon.
32 Ze zeden tegen nkander: "Ston ons haart nait in vuur zo as e onderwegens tegen ons pruit en ons de Schriften dudelk muik?"
33 Votdoalek kwammen ze in t èn en gingen weerom noar Jeruzalem tou. Doar vonden ze de elm en d'aandern bie nkander.
34 Dij zeden: "t Is zo! De Heer is opwekt! Simon het hom zain!"
35 Zai vertelden wat of ze onderwegens beleefd haren en hou of ze hom weer kend haren, dou e t brood breken dee.
36 Ondertied dat ze t doar nog over haren, ston haizulm inains middenmaank heur en zee tegen heur: "Vree mit joe!"
37 Ze werden glad verallereerd en mainden dat ze n gaist zagen.
38 Hai zee tegen heur: "Woarom bin ie zo van streek? En woarom komt ter twievel in joe op?
39 Kiek mor noar mien handen en vouten. Ik bin t echt! Kom mie mor aan en bekiek mie mor. n Gaist het ja gain vlaais en bonken, zo as ie zain dat ik heb!"
40 Mit dat e dat zee, luit e heur zien handen en vouten zain.
41 Dou ze der nog nait bie konden, zo blied wazzen ze, en zok verwonderden, zee e tegen heur: "Heb ie hier ook wat te eten?"
42 Ze langden hom n stok broaden vis tou.
43 Hai pakte t aan en at t veur heur ogen op.
44 Hai zee tegen heur: "Dit was mien zeggen, dou ik nog bie joe was: t mout aal gebeuren wat of over mie schreven staait in Mozes zien wet, bie Profeten en in Psaalms."
45 Dou gaf hai heur inzicht, dat ze begrepen wat of ter schreven staait.
46 Hai zee tegen heur: "Zo staait t ter. De Christus mout lieden, en op daarde dag oet t graf weer opstoan.
47 Op zien gezag mout aan ale volken, te begunnen bie Jeruzalem, bosschop brocht worden dat ze zok bekeren mouten om vergeven van zunden te kriegen.
48 Ie binnen doar getugen van.
49 Denk ter om! Ik stuur joe wat of mien Voader beloofd het. Blief doarom in stad, net zo laank dat ie oetrust worden mit kracht van boven!"
50 Dou brochde hai heur tou stad oet aan Betanië tou, dee zien handen omhoog en zegende heur.
51 Dou e doar nog mit dounde was, ging e bie heur vot en wer opnomen in hemel.
52 Zai vuilen veur hom deel en gingen deurhèn blied weerom noar Jeruzalem.
53 Ze huilen aalweg in tempel tou en prezen God.
|
